NGAYONG PEBRERO PA NAGPARAMDAM

"Ngayong pebrero pa nagparamdam"

by Donfelimon Poserio

Ngayong pebrero pa sila naglabasan

kung kelan nais mong magbingi-bingihan o maging manhid na lang

nang sa tabi ng aming paaralan nang minsang sikmura'y kumalam

sa jolly sphaghetti at one piece chickenjoy ay natakam

ay may white lady sa bagong bukas na jolibee na biglang nagparamdam

gaya ng nakapangingilabot na dati nang karanasan, balahibo'y nagtaasan

nanginig ang kalamnan, at butil-butil na pawis ang nagpatakan

hindi ako takot sa multo ngunit takot ako sa mga nagpaparamdam

dahil sa una lang sila magaling at magsasawa rin kalaunan

matapos mong umasa at umasam sa isang matamis na samahan

at oo, pinatakam ka lang ng nagparamdam

at di ka naman pinatikim ng kahit kunting pagmamahal,

at kahit na para kang namatayan nang nagkalabuan

ay wala kang karapatang magdamdam

dahil wala nga kayong malinaw na usapan.

Naparam bigla ang gutom ko kahit nasa harap ng kainan

nang nagkwento ang kakaibang nilalang tungkol sa kanyang nakaraan

sa lugar ding ito siya'y pinagsamantalahan

sinamantala ng inibig niyang lalaki ang kanyang kahinaan

wala pa siya noon sa tamang gulang

mabilis nahulog ang damdamin sa taong inakalang

magpaparamdam sa kanya ng kasiyahang inaasahan

at oo, pinatakam lang din siya ng nagparamdam

at di naman pinatikim ng kahit kunting pagmamahal,

at dahil nagkalabuan, nagdesisyon siyang ang buhay ay wakasan

kahit alam niyang wala siyang karapatang magdamdam

dahil wala naman silang malinaw na usapan.

umasa siyang may sasagip sa kanyang pagtatangka

umasa siyang may babalik sa gitna ng pangungungulila

umasa siyang labis hanggang sa matantong wala 

Wala naman palang sasalo sa pagkahulog niya

sa ilusyong tinahi ng maling akala

at bago pa pumatak ang luha ko sa nilalang na pinaasa

bigla siyang naglaho na para ba akong namalikmata

"good afternoon, what's your order sir," ang bati ng nagsalita,

ngumiti ako sa crew ng jolibee at pautal na nagwika,

"jolly sphaghetti at one piece chickenjoy, for take out sana,"

"sir waiting muna tayo for 10 minutes sa chicken, okay lang ba?"

"willing to wait ate, basta ba sigurong darating ha,"

ngumiti lang si ate habang natatawa,  

may sasabihin pa sana ako nang tumalikod siya 

"ate, ayaw kasi namin yung pinapaasa,"